Klönen in`n Advent
An Dönnersdag, 11.12. satten wi mit dartig Lü va`n Heimatverein in use Heimathus in de Karkstraote tohope. Et was wär “Klönen im Advent” un so habt wi us bi Tee un Beschüt unnerhollen öwer dütt un dat.
Luise freide sück, dat so väle kaomen wassen.
Dann sä sej “Besten Dank” an Klene Heinz, daor vör, dat hej bi dat Schmücken van usen Marktbrunnen un bi`d Upstellen van usen Maiboom immer vörangeiht. Dat wi bi üm uk Kränsen düt un den Maiboom wegstellen kaönt, dat is nich selbstverständlich!
Un dorüm: Besten Dank, Heinz!
Dann gaff dat ne Überraschung! De Nikolaus köm in`t Hus. Wi süngen als dat Laid “Well kump daor mit den groten Sack…”. Nikolaus was nich mit sienen Knecht Ruprecht kaomen und hej freide sück öwer dat Läid, wat man sör sienen Boart gaud säihn kunn.
Nikolaus wüss natürlich öwer alet und ale Beschäjd. Hej was gaud taufrää mit ale Ehrenamtlichen van usen Heimatverein! Hej sä, dat dat uk gaud wass vör de ganze Gemeinde. Ale, dej mitmaokt han, wassen gaud dorbie!
Hej sä uk, dat hej dat genau wüsse, bi dej äine oder annere Veranstaltung was hej sümmes dorbie wän, man inkognito, wo hej sück utdrücken dö.
Dann müss hej wieder un wi habt üm mit plattdütske Läier verabschieden daon. Maria ha noch äin Wiehnachts-Läid up Laoger, wat sej in de Schaule lehrt ha. “Sünner Klaos” will dat Läid unbedingt tauken Jaohr hörn! Dat häit: hej kump wal wär!
Julia vertäll`d us noch, wo Wiehnachten in Spanien fiert wöt. Ganz anners, as bi us! Man dat vertäll ik jau anner Maol.
Dann häbt wi noch knobelt. De ersten dräi Plätze güngen an Julia, Günther un Jan. Hermann, mit de minnsten Oogen, hav twäi Priese krägen: äinen Trostpries un ne Inladung nao de Knobel-Schaule in Knobelhusen. Ik haope, dat hej dat daor lernen däit.
Petra un Hans bünt twäi Näie un wi freid us, dat sej dorbie bünt.
Nao so vull Tee gaff dat nu wat leckeret Kölleret, un dann wödde vull lacht un Döönkes vertällt.
Dat was richtig moi!
Besten Dank an ale, dej daor tau wat bidraogen habt, dat dat so moi was, un dat wassen:
Agnes, Helga, Karola, Katharina un Luise.
Ik glöwe, dat ik kienen vergäten hav.
Dann man bis tauken Jaohr: KLÖNEN IN´N ADVENT
